Mukha

 Ng una kong masilayan ang kanyang mukha

Ito’y mistulang isang magneto, ako’y napatulala

Animoy isang anghel na bumaba sa lupa

Kay ganda, kay amo, napakatalinhaga.

-o-

Napakasarap tingnan ang mukhang iba sa pangkaraniwan

Sadyang takaw-pansin, di kailangang ipagpilitan

Kay sarap tingnan ang bawat anggulo

Bawat sulok, nanaisin mong masaulo.

-o-

Ah, sadyang nakakabihag ng puso

Mapapaibig ka kahit di naisin ng iyong puso

Ang mukhang inosente at walang ginagawa

Masilayan mo lang, ang puso mo ay walang kawala.

-o-

Sadya sigurong ginawang makapangyarihan

Ang isang mukhang kagaya mo na kaibig-ibig pagmasdan

Upang magbigay saya at inspirasyon

Sa bawat nilalalang, ibayong saya ang pabaon.

-o-

At sa bawat pagpikit ng aking mga mata

Ang taglay mong ganda ay baon ko sa gunita

Isang simpleng bagay na tyak di mo pansin

Pero isang alapap ang hatid sa akin.

-o-

Siguro sapat na ang mga pagkakataong katulad nito

Ang ika’y maging inspirasyon dito sa puso ko

Sapat na ang ligayang laging hatid mo

Sa tuwing masisilayan ko ang mukha mo.

-o-

-o-

-o-

Hay buhay! Lam mo yon, walang kahirap-hirap, kahit di ngumingiti, mukha pa lang ulam na. Manang! Kanin pa nga! Hehe

Pagsinta ni Richmond

Kakatuwa ang isang binatang tumitibok ang puso
May ningning ang mga matang mahirap matanto
Mga ngiti sa labi ay nakakahalinang pagmasdan
Di mo alam kung saan galing ang nadaramang kaligayahan.

-o-

Bawat sandali, akala mo ay sa rurok ng langit
Parang lumalakad sa ulap sa pagdaan ng bawat saglit
Parang anghel na may dalang lirang umaawit
Pag-ibig na nadarama ang laman ng bawat sambit.

-o-

Sadyang makapangyarihan ang dikta ng puso
Sa binata’y dulot ang kakaibang pagkahurayo
Ang ligaya at saya ay sobrang nakakahalina
Pati ikaw ay madadala sa ligayang kakaiba.

-o-

Panalangin ko para sa binatang ito
Sana makamit mo ang iyong gusto
Sana ang pinapangarap mo ay magiging iyo
At nawa’y lumigaya sya sa piling mo.

– o – o – o –

Para ito sa pagsintang “pururot” ni Richmond. Peace man hehe